ركزوا معايا
وهو بيلعب سيدنا جبريل جاله وصرعه...يعنى اغمى عليه..وشق صدره فوق القلب كده وطلع قلبه من جواه...وشال من جوا القلب علقه...حاجه سوده كده وقال دا حظ الشيطان منك...يا الله يعني شال من قلبه اي سواد او غلط او سيء ممكن يسببه الشيطان...وغسل قلبه ف طست من ذهب...زي طبق كده من الدهب وجوه ماية زمزم...غسله كويس وبعدين لأمه يعني صلحه تاني وبعدين رجعه جوا صدره
العيال اللي كانوا معاه طبعا مشافوش حاجه غير انه اغمى عليه...جريوا على مامته اللي هي السيده حليمه وقالولها الحقي محمد مات
مماتش وفاق وكله بس السيده حليمه فضلت خايفه افرضوا جراله حاجه اقول لامه وجده ايه !! لا لا انا هرجعه لامه احسن
وفعلااا رجعته للسيده امنه وفضل معاها لحد ما تم 6 سنين
وهو 6 سنين اتيتم من الام كمان السيده امنه راحت تزور قبر جوزها عبدالله ابو النبي ف يثرب(رحلة 500 كيلو متر) شفتوا الوفاء!! رحلة 500 كيلو عالجمل ف الصحرا عشان تزور قبر جوزها وكان معاها سيدنا محمد وخادمتها ام ايمن وجد النبي عبد المطلب...قعدوا هناك شهر ووهما راجعين ف الطريق مرضت وماتت السيده آمنه
راح لمين سيدنا محمد؟ لجده عبد المطلب...كان بيعشقه وبيفضله حتى على ولاده اللي هما عمام النبي...كان عبد المطلب بيقعد دايما ف مجلس ليه جمب الكعبة كده وولاده اللي هما عمام النبي يقعدوا حواليه...مكنش حد منهم يتجرأ يقعد على فراش باباهم احتراما ليه انما سيدنا محمد كان بيقعد عليه عادي يقولوله يابني قوم قبل ما جدك ييجي مينفعش تقعد مكانه...ييجي عبد المطلب ويقولهم سيبوه محدش يقومه..والله محمد دا هيبقى شأنه كبير وعظيم اوي ويقعد جمبه عالفراش ويمسح على ضهره بإيده
يبقى والده عبدالله توفى من قبل ما يتولد..مامته آمنه توفت وهو 6 سنين...وجده عبد المطلب كمان توفى وهو عنده 8 سنين وكام شهر بس قبل ما يتوفى ادى كفالته لعمه ابو طالب (عم النبي) ووصاه برعايته من بعده
عمه ابو طالب كان خير سند ليه...بكره هنكمل ان شاء الله من اول حياته مع عمه ابو طالب
وتابعوا كل يوم الحلقة
~