الحلقة التالتة من سيرة الرسول صل الله عليه وسلم
صلوا عليه الاول
وقفنا امبارح عند وفاة عبد المطلب جد النبي وهو ف سن 8 سنوات...وعمه ابو طالب اتكفل برعايته وكان بيعامله زي ولاده بالظبط...سيدنا ابو طالب زي ما هنشوف فضل اربعين سنة سند للنبي وبيدافع عنه ويحميه ويخاصم ويعادي ويصادق عشانه وف ضهره
ننط شويه...النبي بقى 12 سنة...خده معاه عمه ف رحلة من رحلات التجارة للشام...وهما ف الطريق عند بلد اسمها (بصرى) خرجلهم راهب اسمه جرجيس...جرجيس دا كان راهب مسيحي بس مسيحي صح بيتبع المسيحية الصحيحه اللي قبل التحريف...الرهبان كانوا ف صومعتهم بيتعبدوا مبيخرجوش...بس هو خرجلهم وضايفهم كمان لاول مره
طب ليه؟؟
مسك النبي من ايده وقال دا سيد العالمين...دا رحمة العالمين
ابو طالب استغرب اوي قاله عرفت منين؟؟ قاله لما جيتوا مفيش ولا حجر ولا شجر الا وسجدله...ودول ميسجودش الا لنبي...يا الله سجدله الحجر والشجر وهو لسه طفل 12 سنة...جرجيس كان مؤمن بالمسيحية الصح اللي معترفة بقدوم نبي اخر الزمان...قاله دا مذكور ف كتابنا..ونصح جرجيس عمه ابو طالب انه يرجعه مكه وميروحش بيه الشام خوفا عليه من اليهود...وفعلا عمه ابو طالب بعته تاني مكة.
يكبر بقى النبي ومعروف انه ف اول شبابه مكنش ليه مهنه محدده...اللي وصلنا بس انه كان بيرعى الغنم...لحد ما كبر وبقى شاب 25 سنة وبدأ التجاره...هنبدأ بقى ف الاحداث الحلوه
النبي خرج يتاجر في مال السيده خديجة...خلونا نعرف السيده خديجة الاول
السيده خديجة بنت خويلد...كانت زي ما بيقولوا من عيلة كبيرة اوي..صاحبة شرف يعني...ومال...كان عندها مال كتير وبتأجر الرجاله يتاجرولها ف مالها وتديهم نصيبهم...كان عندها 40 سنة في الوقت اللي النبي كان 25 سنة وسمعت عن امانته وحسن خلقه فبعتتله وقالتله يتاجرلها بمالها ف الشام..وافق رسول الله وراح الشام وبعتت معاه غلام (زي خادم عندها) اسمه ميسرة.
لما رجع النبي من رحلة التجارة لمكة..لقت السيده خديجة ف مالها بركة وربح زياده...لقته امين اكتر ما سمعت عنه...سألت الغلام ميسره عليه...قالها كلام زي الفل...ف ايه بقى اعجبت بيه ااه مش عيب ولا حرام...اتمنته زوج ليها...اصلا كل عيلتها كانوا عاوزينها تتجوز وهي لقت اللي بتحلم بيه
بس ايه بقى...الحيااااااء يا بنات النبي الحياء...مراحتش قالتله انا معجبة بيك تتجوزني!
لا...قالت لصحبتها (كان اسمها نفيسة) ونفيسة راحت للنبي قال يعني بتقترح عليه قالتله ايه رأيك ف خديجة؟ قالها يا سلام ! ياررريييت....الستات ستات برده باختلاف الزمن
المهم خد اعمامه وراحوا لعمها وخطبوها منه وبعدها اتجوزوا الكلام دا كان بعد رجوع النبي من رحلة التجارة بتاع الشام بشهرين
السيده خديجة كانت وقتها ف مكة افضل النساء ف المكانه والنسب والشرف والاخلاق وكله...دا اللي يليق بالنبي...بس ليه كانت اكبر منه ب 15 سنة !!!!! ايه الحكمه ؟!!
في حلقة بكره هنعرف عن اول يوم جه الوحي لسيدنا محمد...سيدنا محمد وقتها كان مرعوب...وقتها كان محتاج ام اكتر من زوجة...ربنا اداله اللي تجمع بين انها تكون زوجته وتجمع كمان من العقل والحنيه اللي تعرف تحتويه وتطمن خوفه...وكمان لو كانت صغيره 17 او 20 او حتى 25 اده...ممكن تكون لسه صغيره انها تشيل هم الدعوه معاه...ممكن كانت تخاف وتسيبه...ربنا بحكمته بيعمل كل حاجه لسبب
النبي عليه الصلاة والسلام متجوزش على السيده خديجة لحد ما ماتت
كل اولاده كانوا منها الا ابراهيم
طيب حلو مين اولاده؟ تعالوا نعدهم
القاسم...عشان كده النبي كانت كنيته او بيتقاله يا ابا القاسم
وزينب ورقية وام كلثوم وفاطمة وعبدالله
يبقى 6 من السيده خديجة مع ابراهيم يبقوا 7
كل اولاده الصبيان ماتوا وهما صغيرين انما البنات كلهم عاشوا لحد الاسلام والهجره وكلهم ماتوا وهو عايش الا فاطمة ماتت بعده ب 6 شهور
كفاية بقى النهارده كده
حب النبي 3
~
موضوع: الحلقه االثالثه من سيرة الرسول " صل الله عليه وسلم " 
الثلاثاء أغسطس 23, 2016 12:15 am
