صلوا على سيدنا محمد
كذا بنت سألتني ليه كاتبه تاريخ ميلاده يوم 9 ربيع اول واحنا بنحتفل بيه يوم 12..طبعا الاحتفال بالمولد النبوي اصلا بدعة وغلط...بس خلينا ف موضوع التاريخ...تاريخ مولده عليه الصلاة والسلام فيه اختلاف من 9 او 12 وفيه روايات يوم 2 وفيه غيرها...فانا بنقل الرواية الاكتر تأكيدا...كمان لازم نفهم ان الكلام دا كان من مئات السنين وهييجي روايات مختلفه عن التواريخ وعدد الايام وحاجات كتير فلازم نكون مرنين كفايه اننا نتقبل اختلافات بسيطه ممكن تقروها ف مكان تاني عن اللي بنقله ليكم لانها اختلاف ف الروايات اللي وصلتلنا من زمنه صلى الله عليه وسلم...وكمان احنا يهمنا نعرف عنه وعن حياته وشخصيته ورسالته ودعوته واجتهادنا ف التفاصيل الدقيقه حاجه زياده مننا انما لازم نفضل مركزين ف الهدف الاساسي بغض النظر عن التواريخ..
حاجه كمان اتسألت ازاي فيه ربيع اول وازاي فيه رمضان واصلا مكنتش لسه الهجره حصلت...بحثت كتير وعلى اد ما فهمت ان الشهور دي كانت موجوده اصلا عند العرب من قبل الهجره مع اختلافات بسيطه بس كان فيه محرم وربيع اول ورمضان وكله انما مكنش فيه سنة هجرية يعني كانوا بيقولوا ولد سيدنا محمد ف 9 ربيع اول من عام الفيل..
او من العام اللي حصلت فيه كذا او كذا...انما مكنش فيه تقويم سنة هجرية..دا اللي قدرت اوصله والله تعالى اعلى واعلم.
نصلي عالنبي 10 مرات كده عشان ندخل ف حلقة النهارده
ربنا اول اوامر نزلها على رسوله كانت بتختصر تعاليم الدين كلها...قلنا قبل كده انزل عليه سورة المدثر "يا أيها المدثر *قم فأنذر*وربك فكبر*وثيابك فطهر* والرجز فاهجر* ولا تمنن تستكثر* ولربك فاصبر"
تعاليم اساسيه واضحه...قوم يا محمد من تحت الغطا ومتخافش..قوم لرسالتك قوم انذر الناس من النار...وكبر ربنا وقول ان مفيش اله غيره..وطهر ثيابك بالاغتسال لان دينا دين طهاره...والرجز اللي هي الاصنام والشرك اهجرهم...ولا تمنن تستكثر يعني متتكبرش عالناس وتمن عليهم بالدعوه...ولربك فاصبر لانك هتشوف عداء صعب اوي وسخرية من قومك
ربنا بعتله الوحي...خاف...سابه فتره يهدى ويتطمن...بعتله تاني الوحي...اتاكد خلاص انه نبي الله...نزل عليه اول اوامر واساس اوامر الدين...نبدأ الدعوه بقى...بسم الله
الدعوه كلها استمرت 23 سنة...هنقسمهم 13 سنة في مكة و10 في المدينة
طيب الدعوة في مكة !! هنقسم ال 13 سنة بتوعها على 3 مراحل
3 سنين في السر...وهنفهم ليه في السر
7 سنين جهارا يعني في العلن بس داخل مكة
و3 سنين جهارا بس خارج مكة
نيجي لاول مرحلة وهي ال 3 سنين السر جوا مكة...ليه الدعوة في السر؟؟
مكة كانت مركز العباده وفيها الكعبه وعبادة الاصنام فيها ف اوجها...انه فجأة يطلع يقولهم مفيش اصنام وهتروحوا النار كلكم تخيلوا كده !! كانت هتتقلب عليه...كانت هتبقى كارثه خصوصا اننا فهمنا ان اهل مكة اد ايه متعصبين لدينهم وعقائدهم
كان لازم تمهيد...لازم من تحت لتحت نعمل ارضية نعرف نقف عليها...طب ايه هي الارضية دي؟! الارضية دي هي المسلمين الاوائل....عشان يوم ما النبي يواجه ميواجهش لوحده...لا يكون معاه مجموعه مسلمة تدافع عنه وتشد ازره
فكان من الطبيعي والبديهي ان النبي هيعرض الاسلام اول حاجه على اقرب الناس ليه...وفعلا صدقوه ووقفوا جمبه ومشكوش فيه لحظة ودول اتسموا "السابقين الأولين" وكان على رأسهم السيدة خديجة زوجته وزيد بن حارثه اللي اتكلمنا عنه وابن عمه علي بن ابي طالب (وكان وقتها صبي وعايش في كفالة النبي) واقرب اصحابه اللي هو سيدنا ابو بكر...ال 4 دول اسلموا اول يوم ف الدعوه
بعدها بقى بدأ ابو بكر يساعده وينشر الاسلام معاه من تحت لتحت...هو اصلا كان راجل وشه سمح زي ما بيقولوا وكل الناس تحب قعدته...وكان معارفه كتير ومعظمهم ناس شأنهم كبير...فكان لما يقعد معاهم يكلمهم عن الاسلام وفعلا اسلم على ايده سيدنا عثمان بن عفان والزبير بن العوام وعبد الرحمن بن عوف وسعد بن ابي وقاص وطلحة بن عبيد الله التيمي
دول كانوا اول ناس دخلت الاسلام وكلهم اسماء مهمه وكبيره وهتقابلنا تاني قدام
فيه طبعا ناس تانيه كتير كانوا من السابقين الاولين اشهرهم بلال بن رباح الحبشي وابو عبيدة بن الجراح وسعيد بن زيد ومراته فاطمة بنت الخطاب اللي هي اخت عمر بن الخطاب
المهم انهم كانوا كتير ما يقرب من 40 بس انا حاولت اقول اهم واشهر الاسماء...كان النبي بيجتمع بيهم ف السر والوحي كان وقتها متتابع والسور كانت قصيره وبتتكلم عن تزكبة النفس من اي حاجه وحشه ف الدنيا وبتصف الجنة والنار وطبعا كان بينقل كل دا ليهم... هما دول السابقين الاولين...دول الارض اللي هنبني عليها...دول اللي شالوا الدعوه مع النبي عليه الصلاة والسلام
صلوا عليه 10 مرات الصلاة....
احنا عارفين ان الخمس صلوات اتفرضوا علينا ف ليلة الاسراء والمعراج...طب لحد وقتها...من اول الاسلام لحد ليلة الاسراء والمعراج مكنش فيه صلاة؟؟
لا كان فيه...فيه اختلاف في الروايات لكن نقدر نقول ان الرأي الغالب انهم كانوا ركعتين قبل طلوع الشمس وركعتين قبل غروبها
ابو طالب شاف ابنه علي والنبي بيصلوا مره...فقالهم بتعملوا ايه قالوله بنصلي...فامرهم يثبتوا وشجعهم
خلينا نكون عارفين ان ابو طالب برغم حبه للنبي وتشجيعه ليه وحمايته ليه ووقوفه جمبه الا انه مأسلمش...ابو طالب مات كافر
كان مصدق النبي وواقف جمبه بس على لسانه قال...انا اشجعك يا محمد واقف جمبك واحميك انما نفسي مش جايباني افارق دين اهلي
يوم وفاته النبي فضل يقوله يا عمي قول الشهاده قول الشهاده...قاله لو قلتها هيبقى عشان مزعلكش بس
وفيه نزل كلام ربنا "انك لا تهدي من احببت "
ومفيش شك ان ابو طالب ف النار...بس ف اخف اخف اخف درجة عذاب ف النار لان النبي شفعله طبعا...عارفين ايه اخف درجة عذاب ف النار دي؟؟ انه لابس نعل (حذاء يعني) بيغلي منه مخه...ميتشرحش وميتوصفش رحمتك بينا يارب
طيب نستغفر المره دي 10 مرات وندعي...اللهم حرم جسدي وعظمي ولحمي وجلدي وشعري على النار
المهم الدعوه اه كانت سرية بس الكلام بدأ يسمع في قريش بس تقريبا محدش اهتم بيها كانوا فاكرينه عاوز يلفت النظر ليه او واحد من اللي بيحب يتكلم ف الدين ويلم الناس حواليه...لحد ما بدأ الكلام عن الاسلام يزيد ويزيد وهنا بدأ القلق بقى
فات 3 سنين كده على سرية الدعوة والنبي كون جماعة من المسلمين تعينه وتساعده وتقف جمبه...وجه الوقت ونزل ربنا الوحي لسيدنا محمد انه يعلن الرسالة ويواجه قومه..
بكره بعون الله مرحلة الدعوه في العلن
صلوا عليه [size=1]:*[/size]
"
موضوع: الحلقه السادسه من سيرة الرسول " صل الله عليه وسلم " 
الثلاثاء أغسطس 23, 2016 12:27 am
