مين فاكر ورقة بن نوفل؟؟ تعالوا نتكلم تاني عنه
ورقة بن نوفل كان ابن عم السيدة خديجة..كان من الناس القليله اللي مش عاجبها عبادة الاصنام وحاسس انهم بعدوا عن عقيدة سيدنا ابراهيم...بحث ف الكتب السماوية واستقر على النصرانية...كان بيعرف يكتب لغة اسمها العبرانية وكان بيترجم الانجيل للعبرانية..دا كله لحد امتى؟ لحد ما جه الوحي لسيدنا محمد وزي ما فاكرين كان ورقة تاني حد يعرف عن الوحي اللي جاله بعد السيدة خديجة...هو صدق النبي وقاله دا نفس الناموس (ملك الوحي) اللي نزل لابراهيم...وان لو ربنا اداني عمر هقف جمبك وانصرك لما قومك يعادوك ويطردوك...وقلنا انه مات قبلها...طب هو مات مسلم ولا لا؟! هو صدق الوحي انما محضرش الاسلام ولا رسالته ولا قال انه اسلم...مجرد تصديقه للوحي وحلفانه ان دا وحي من ربنا فهو ايمان واسلام تلقائي منه
سيدنا النبي قال انه شافه ف المنام لابس ابيض يبقى هو من اهل الجنة لانه لو من اهل النار كان شافه لابس حاجه تانية
و مره تانيه قال النبي "رأيت لورقة جنة أو جنتين"
يبقى ورقة كان مسيحي قبل الوحي اللي نزل للنبي...انما نقدر نقول انه مات مسلم وانه من اهل الجنة ان شاء الله
نرجع نكمل مكان ما وقفنا...قسمنا الدعوه لقسمين :
ف مكة 13 سنة وف المدينة 10 سنوات
وقلنا جوا مكة 3 سنين سرا واتكلمنا عنهم امبارح
دلوقتي هندخل ف تاني مرحلة...مرحلة المواجهة مرحلة اعلان الدعوة لقومه
ربنا امر النبي بالمجاهرة بالدعوة...فأنزل عليه "وأنذر عشيرتك الأقربين"...الأية دي ف سورة الشعراء...سورة الشعراء اللي اتكلم فيها ربنا عن قصة سيدنا موسى من اول النبوة لحد الهجرة مع بني اسرائيل...القصه بكل نواحيها اللي بتشمل اضطهاد وتكذيب وغيره...ربنا سبحانه كان عاوز يمهد لسيدنا محمد اللي هيحصل...بيجهزه ويجهز نفسيته للي هيشوفه من قومه..وبرده ف نفس السورة ربنا وضحله اللي حصل للناس اللي كذبوا نبيهم...قوم نوح وعاد وثمود وغيرهم...عشان يوضحله اخرة اللي هيكذبوه هتكون ازاي وان هو والمؤمنين معاه رابحين ف الاخر مهما حصل.
اول ما الآية دي نزلت...النبي دعا اهل بني هاشم عشان يقعد معاهم...ومنهم عمه ابو لهب
مين ابو لهب؟
ابو لهب عم النبي...اخ مش شقيق لعبدالله ابو النبي..اسمه الحقيقي عبد العزي بن عبد المطلب...ابوه عبد المطلب اللي سماه ابو لهب عشان وسيم ووشه مشرق
المهم النبي جمعهم...كانوا تقريبا 45 واحد...النبي لسه منطقش...لقى ابو لهب بيقوله انا مشفتش حد عمل زيك كده ولا دعا اهله لشر زي اللي انت عايز تدعينا ليه دا
معنى الكلام طبعا انه كان عرف عن الاسلام وسمع عنه من قبل ما النبي يجمعهم بس مكنش مهتم لان كان كل واحد مع نفسه ف بيته انما انت عاوز تكبر الموضوع بقى وتدعينا كمان للشر والفسق دا وتقولنا نسيب الالهه بتاعتنا..ف لا يا محمد
النبي سمع الكلام وسكت...ودا كان من حكمته عليه الصلاة والسلام...هو لقى الجو مشحون اصلا وان الوقت مش مناسب عشان يعرض دعوته عليهم
عدى شوية وقت وجمعهم النبي تاني وقالهم انه نبي من ربنا وكلمهم عن التوحيد وعن الجنة والنار والحساب وغيره
فرد عليه عمه ابو طالب وقاله انا معاك وهساعدك ومصدقك بس للاسف مش هقدر افارق دين اهلي (زي ما قلنا قبل كده انه مأسلمش ومات كافر)
المهم ابو لهب رد وقال فيما معناه احنا كده رحنا ف داهيه...متسكتوش لمحمد وعقلوه بدل ما غيرنا يعقله
ابو طالب رد وقاله والله طول مانا عايش لاحميه واقف جمبه
اتأكد النبي ان عمه ابو طالب ف ضهره وهيحميه...فطلع يوم فوق جبل الصفا ونادى الناس وقالهم هو انا لو قلتلكوا ان فيه خيل ف الوادي عاوزه تهجم عليكم هتصدقوني؟ فقالوله اه هنصدقك احنا عمرنا ما شفنا منك غير الصدق...فقالهم طيب انا نبي الله وجاي احذركم من عذابه ودعاهم للتوحيد والايمان برسالة الاسلام وباليوم الاخر
ابو لهب كان واقف وقاله تبا لك هو انت عشان كده جمعتنا؟!
ونزلت فيه سورة المسد "تبت يدا ابي لهب وتب..ما اغنى عنه ماله وما كسب...سيصلى نارا ذات لهب...وامرأته حمالة الحطب..في جيدها حبل من مسد"
تبت يعني خسرت وخابت...وتب يعني فعلا اتحققت خسارته وهلاكه...ابو لهب قال لو محمد طلع صح هبقى يوم القيامة افدي نفسي بمالي وولدي...فربنا قاله لا مش هيغني عنك مالك ولا ما كسبت اللي هو ولده...هتبقى خالد ف النار...ومراتك ام جميل (اروى بنت حرب) اللي كانت بتشيل الحطب والشوك وترميهم ف طريق النبي هيبقى ف رقبتها طوق من حديد
ربنا انزل على سيدنا محمد "فاصدع بما تؤمر وأعرض عن المشركين"
وفعلا بدأ النبي يتكلم عن الاسلام وينتقد الشرك والخرافات ويوضح القيمة الحقيقيه للاصنام ومكة طبعا كانت غضبانه جدا لانه كده بيغلطهم وهما عندهم كبر شديد ولانه عاوز يلغي بكل بساطة اللي بقالهم سنين وسنين عايشين عليه ومقتنعين بيه
هما لقوا الاسلام دين هيمنعهم عن انهم يعلموا اللي نفسهم فيه زي زمان وهيضطروا ييجوا على رغباتم عشان يرضوا ربنا لا وكمان مش هيبقى عندهم نفس الكبر والسياده بتوع زمان فمعجبهمش الحال وشافوا ان دا يقلل من كرامتهم وخلاهم يتكبروا اكتر
بس برده خافوا لان محمد صادق وامين وناس كتير هتصدقه وتمشي وراه...ففضلوا يفكروا يعملوا ايه يعملوا ايه لحد ما قرروا يروحوا لعمه ابو طالب وطلبوا منه انه يرجع محمد عن اللي هو فيه وقالوله انه كده بيهينهم وبيهين دينهم ودين اهلهم...هما راحوا لابو طالب لانه زيهم متمسك بعبادة الاصنام فقالوا هيبقى معانا بقى...بس هو زي ما بنقول كده سكتهم ورد عليهم رد لطيف قفل بيه الكلام وكمل ف تشجعيه ونصرته للنبي.
كفاية كده
بكره ان شاء الله هنكمل ازاي حاولوا يوقفوا دعوته للاسلام بأي طريقة
صلوا عليه
موضوع: الحلقه السابعه من سيرة الرسول " صل الله عليه وسلم " 
الثلاثاء أغسطس 23, 2016 12:30 am
