بسم الله
صلوا عاللي هيشفعلنا
كنا وقفنا امبارح عند الاضطهاد ومحاولات المشركين لوقف الدعوة بالتكذيب والافتراء والسخرية والمفاوضات الخايبة بتاع نعبد كل يوم اله دي
نيجي بقى لمرحلة جديدة من الاضطهاد....الاضطهاد بالتعذيب
يمكن التعذيب مكنش للنبي اد ما كان للي اسلموا واتبعوه...لان النبي كان لسه ف حما عمه ابو طالب برده...انما معظم اللي اسلموا في الاول كانوا عبيد ونساء...ناس مستضعفين وكبار قوم قريش داسوا عليهم حرفيا ووروهم اشكال بشعة من العذاب
صلوا على النبي
لما لقى المشركين ان مفيش فايده وانهم مش قادرين يوقفوا الدعوه..اجتمعوا تاني اهم 25 راجل من اسياد قريش وكان الريس المره دي عم النبي اللي هو ابو لهب....فكروا كتير ولقوا ان مفيش حل غير ايذاء النبي وتعذيب اللي معاه
بدأوا في التنفيذ فعلا...كان ابو لهب عنده ولدين اسمهم عتبة وعتيبة...كانوا متجوزين بنتين من بنات النبي اللي هما رقية وام كلثوم...ولما جه الإسلام أمر ابو لهب ولاده انهم يطلقوهم.
يوم ما مات عبدالله ابن النبيابو لهب زي ما بيقولوا عمل فرح وفضل يهني الناس ويقولهم محمد بقى ابتر (ابتر يعني منقطع نسله اللي هو ملوش ابن يشيل اسمه)
ابو لهب كان بيمشي ورا النبي في الاسواق يضربه بالحجارة لحد ما رجل النبي الشريفة تجيب دم....مرات ابو لهب (ام جميل واسمها اروى بنت حرب( زي ما قلنا بتلم الشوك وترميه ف طريقه وتحطه قدام باب بيته بالليل....وكانت ست لسانها طويل تفضل تشتم فيه وهو رايح ووهو جاي....وسمعت ام جميل عن السورة اللي نزلت فيها هي وجوزها (سورة المسد) فراحت تدور على النبي عند الكعبة....كان النبي فعلا قاعد ومعاه ابو بكر...بس سبحان الله ربنا عماها عن النبي فكانت شايفه ابو بكر ومش شيفاه...ماسكه ف ايدها حجاره وجايه تقول لابو بكر فين صاحبك اللي عمال يشتمني...اشوفه بس وانا اضربه بالحجاره دي....ومشيت...فقام ابو بكر سائل النبي وهو مستغرب اوي وقاله هي مشافتكش؟؟ قاله لا ربنا اخد بصرها عني يعني عماها عني
ابو لهب مكنش بس عم النبي لا ده كمان كان جاره...وكان بقيت جيران النبي بيتفقوا مع ابو لهب عليه....كانوا 5 رجالة يشوفوا النبي بيصلي ييجوا يرموا عليه رحم الشاه....لما المعزه بتولد ياخدوا الرحم بتاعها بالقذاره اللي فيه ويرموها عليه وهو بيصلي....او على باب بيته او جوا بيته....وكان النبي يلم القذورات دي ويقف عالباب ويقول يا بني مناف أي جوار هذا ؟!! هي دي الجيره !!!!
اخبث واحد ف ال 5 رجالة دول كان اسمه عقبة بن أبي معيط..بيحكيلنا عبدالله بن مسعود عن يوم كان قاعد وشايف النبي بيصلي عند بيته....ولقى ابو جهل بيقول لاصحابه اللي قاعدين معاه مين فيكوا يقدر يجيب سلا جزور ويرميها على كتف محمد وهو بيصلي؟؟ يعني ايه سلا جذور؟؟ يعني احشاء الدبيحه (كان فيه ناس دابحه قبلها فكانوا عارفين انهم هيلاقوا )
رد عقبة وقال انا اعملها....وقام فعلا وجاب الاحشاء والدم والقاذورات دي ورماهم بين كتافه الشريفه صلى الله عليه وسلم وهو ساجد
ابن مسعود بيقول وانا شايف ومش عارف اعمل حاجه...كان خايف لانهم كتير واشداء وهو عارف انه مش هيقدر يعمل حاجه....النبي عليه الصلاة والسلام فضل ساجد والاحشاء والدم نازلين على جسمه
..وابو جهل وعقبة واصحابهم نازلين ضحك ويتمايلوا على بعض من كتر الضحك...لحد ما جت السيده فاطمة بنت النبي وشالت القاذورات دي من على ضهره وقومته
النبي قام ودعا عليهم : اللهم عليك بقريش اللهم عليك بقريش اللهم عليك بقريش (النبي كان من عادته يدعي بالحاجه 3 مرات) وسماهم اسم اسم...اللهم عليك بأبي جهل وعليك بعتبة بن ربيعة وشيبة بن ربيعة والوليد بن عتبة وأمية بن خلف وعقبة بن أبي معيط....وكان فيه واحد سابع بس عبدالله بن مسعود مفتكرش اسمه
المهم انهم خافوا جداااا خافوا من دعوته عليهم...وفعلا عبدالله بن مسعود حلف ان كل اللي دعا عليهم النبي ماتوا في غزوة بدر ( بعد 4 سنوات تقريبا)
كان أمية بن خلف ده لو شاف النبي همزه ولمزه يعني يشتمه ويعيب فيه قدامه وف السر وفيه نزل كلام ربنا "ويل لكل همزة لمزة"
أخو أمية بن خلف كان أسمه أبي بن خلف....في يوم عقبة بن أبي معيط قعد وسمع للنبي...لما أبي بن خلف عرف عاتب عقبة أوي وأنبه وقاله لازم تروح لمحمد وتبصق في وجهه راح فعلا عقبة وبصق في وجه النبي الشريف
وأبي بن أبي معيط ده كان بيكسر عظام الحيوانات الميتة لحد ما تبقى زي التراب وينفخه ف الريح اللي رايحه لسيدنا محمد
كان ابو جهل ساعات ييجي للنبي ويسمع منه القرآن...ويمشي ولا اكنه سمعه ولا بيؤمن ولا بيتأدب ولا بيبطل يأذي النبي أو المسلمين لا ده كمان بيبقى فخور بأي حاجه وحشه بيعملها...وكان بيمنع النبي من الصلاة وف يوم شافه بيصلي قاله هو انا مش منعتك انك تصلي!!فالنبي قاله أولى لك فأولى ثم أولى لك فأولى....يعني ويل لك في الدنيا وويل تاني ليك في الاخره
قاله انت بتهددني يا محمد!! انت وربك اللي بتعبده متقدروش تعملولي حاجه....اني لأكثر هذا الوادي ناديا (نادي يعني قوم وعشيرة ) وفيه نزل قول ربنا "فليدع ناديه, سندع الزبانية, كلا لا تطعه واسجد واقترب"
يعني لو هو هيجيب عشيرته...هنجيب احنا الزبانية (ملائكة غلاظ شداد)
موقف تاني لأبو جهل في منع النبي من الصلاة
في يوم سأل الناس هو محمد بيصلي؟ قالوله اه....قالهم واللات والعزى لو شفته بيصلي هدوس على رقبته واحط وشه في التراب !!!!!!!!!!
وفعلا راح للنبي وهو بيصلي ولسه بيقرب منه عشان يعمل كده قام راجع جري وهو خايف....الناس سألوه فيه ايه!! قالهم بيني وبينه خندق من نار وشفت كمان أجنحة...النبي قال لو كان قرب مني خطوة كمان كانت الملايكه خطفته عضو عضو
خلصنا كده معظم الاعتداءات اللي كانت عالنبي عليه الصلاة والسلام
بكره بإذن الله هنعرف الاعتداءات عالمسلمين وتعذيبهم
موضوع: الحلقه التاسعه من سيرة الرسول " صل الله عليه وسلم " 
الثلاثاء أغسطس 23, 2016 12:36 am
