قلبي بيقولي ان محدش راجع امبارح
طااايب...فيه ناس بتدخل ابو لهب وابو جهل في بعض...احنا اريدي اتكلمنا عن ابو لهب بس تعالوا نتكلم عليه تاني ونفرق بينهم
ابو لهب (عبد العزي بن عبد المطلب) عم النبي (اخ غير شقيق لعبد الله ابو النبي) وان ابوه عبد المطلب سماه ابو لهب عشان وسيم ووشه منور...ومراته واحده من سادات نساء قريش وهي أم جميل (أروى بنت حرب) وهي اخت (أبي سفيان) وكانوا معروفين بإيذائهم للنبي وفيهم نزلت سورة المسد...
ابو لهب كانت كنيته (أبو عتبة)...كان عنده 3 ولاد (عتبة ومعتب وعتيبة) عتبة ومعتب أسلموا في فتح مكه انما عتيبة فضل كافر...كان عتبة متجوز رقية وعتيبة متجوز ام كلثوم وابوهم ابو لهب بعد البعثه وخاصة بعد نزول سورة المسد امرهم يطلقوهم...وفعلا طلقوهم...جه عتيبة للنبي وبصق في وجهه الشريف وطلق ام كلثوم...حزن النبي ودعا عليه وقال اللهم سلط عليه كلبا من كلابك..وفعلا عتيبة مات ازاي؟! افترسه الأسد
هو رجع لابوه قاله محمد دعا عليا...وكانوا في طريقهم للشام..قعدوا عند راهب كده فقالهم الراهب الارض دي فيها سباع وذئاب وغيره...فخاف ابو لهب على ابنه وقال يا رجال قريش احمولي ابني انا خايف عليه...وفعلا الرجاله حاوطوا عتيبة من كل ناحيه وجه أسد قرب منهم واحد واحد وشمهم واحد واحد لكن مفترسش غير عتيبة...سبحان الله
أبو لهب مات بعد غزوة بدر بسبع ليالي...قالوا بمرض الطاعون وقالوا مرض زيه كده اسمه العدسة...وفضل 3 ايام لحد ما جثته نتنت...الناس خافوا من العدوى فحفروا حفرة وزقوه فيها بعصاية كده وفضلوا يحدفوا عليه حجارة لحد ما غطوه بيها خالص...محدش حتى لمسه عشان خايفين من العدوى
أم جميل بقى مراته...كان عندها سلسلة كده فيها جوهره غاليه وفخمه اوي...قالت هبيعها ف عداوة محمد...فربنا بدلهالها بحبل من مسد ف الاخره يتلف حوالين رقبتها
ماتت ازاى؟
الجزاء من جنس العمل...كانت كل يوم تروح تلم الشوك والحسك عشان ترميهم في طريق النبي...ف يوم وهي شايلاهم قعدت على حجرة عشان ترتاح...وكان ف ايدها حبل من مسد برده (حبل من الليف المعقود اللي بيشوك)
يقال ان ملك الموت شده على رقبتها وماتت مخنوقه بيه
نيجي بقى لأبو جهل
أبو جهل واسمه (عمرو بن هشام بن المغيرة بن مخزوم) وكنيته (أبو الحكم) النبي هو اللي سماه أبو جهل
عنده 4 أولاد...زرارة بن أبي جهل...تممي بن أبي جهل...عكرمة بن أبي جهل...علقمة بن أبي جهل
مات ابو جهل زي ما قلنا يوم بدر...وكان واحد من اللي دعا عليهم النبي وقال اللهم عليك بأبي جهل
قتله معوذ ومعاذ كانوا شابين عندهم 16 سنة...وكمل عليه بن مسعود وقطع راسه وكمان قطع ودنه (لأن أبو جهل كان قطع اذن ابن مسعود قبل كده)
فل كده؟؟
نكمل بقى من مكان ما وقفنا...بعد الاضطهاد والتعذيب اللي حصل للنبي والمسلمين...كانت الهجرة الأولى للحبشة
اشتدت الاضطهادات اوي ف نص السنة الخامسة من النبوة وفي الوقت دا نزلت سورة الكهف وكان فيها 3 قصص اولهم اصحاب الكهف ودي اشارة للهجره وقصة موسى والخضر ودي اشارة ان الظاهر بيختلف عن اللي ربنا بيدبره وقصة ذي القرنين وفيها اشارة ان ربنا بيورث الارض لعباده الصالحين
وبعدين نزلت سورة الزمر تشير للهجرة بشكل واضح "وأرض الله واسعة"
النبي عليه الصلاة والسلام كان عارف ان ملك الحبشة (أصحمة النجاشي) راجل عادل مبيظلمش حد...فأمر المسلمين انهم يهاجروا للحبشة وفعلا هاجر اول فوج في شهر رجب من السنة الخامسة للنبوة... كانوا 12 راجل و4 ستات وكان على راسهم عثمان بن عفان ومراته السيدة رقية بنت النبي (ايووون السيده رقيه كانت زوجة عثمان بن عفان والسيدة فاطمة كانت زوجة علي بن ابي طالب)
المهم مشيوا ف سواد الليل عشان المشركين مش يشوفوهم وفعلا وصلوا للبحر ولقوا سفينتين تجاريتين ركبوا معاهم للحبشه ووقت ما عرفت قريش بهجرتهم والكفار جريوا يلحقوهم كانوا خلاص هربوا..
في شهر رمضان ف نفس السنة النبي عليه الصلاة والسلام وقف في الحرم وكان فيه مشركين كتير اوي واقفين...وفجأة قعد يقرا في سورة النجم...كل المشركين بلموووا...المشركين كان منهم ناس اول مره فعلا تسمع القران لان كانت الاوامر لا يسمعوه ولا يسيبوا حد يسمعه...النبي فاجأهم فوقفوا يسمعوا وهما متبنجين من روعة الكلام وحلاوته..لحد ما في اخر السورة النبي قال "فاسجدوا لله واعبدوا" وقام ساجد...وقاموا المشركين ساجدين وراه...حاجه لا اراديه من غير تفكير
وطبعا المشركين اللي محضروش الموقف دا لما عرفوا اللي حصل عاتبوهم وقالولهم ازاي تعملوا كده!! فهما خافوا واتكسفوا فافتروا عالنبي وكدبوا وقالوا انه شكر ف الهتنا وطبعا دا محصلش...حاولوا يقنعوا الكفار ان هو شكر ف الهتنا فاحنا شكرنا في الاله بتاعه
الكلام وصل للمسلمين اللي ف الحبشه بس بصورة غلط...وصلهم ان قريش أسلمت...فاطمنوا بقى ورجعوا ومجرد ما وصلوا وفهموا ان مش دي الحقيقه اللي لحق منهم يرجع للحبشه رجع جري واللي ملحقش دخل مكه بس متخفي ومتداري
ورجعنا تاني للاضطهاد والتعذيب اللي زادوا اوي ف النبي امرهم تاني يهاجروا للحبشه وكانت دي تاني هجرة للحبشه وقريش حاولت تحبط الهجره دي بس برده فشلت وقدروا يهاجروا بعون الله 83 راجل و 18 او 19 ست
كفاية كده النهارده...حلقة بكره حلوه ان شاء الله
صلوا على من بكي شوقا لرؤيتنا ~
موضوع: الحلقه ااـ 11 من سيرة الرسول " صل الله عليه وسلم " 
الثلاثاء أغسطس 23, 2016 12:41 am
