قريش فقدت الأمل ف ان ابو طالب يساعدهم...فقرروا ميحترموش جواره وحمايته للنبي...قرروا يقتلوا النبي!!!!
حوادث كتير اتروت لينا في محاولات لقتله عليه الصلاة والسلام...مثلا منها عقبة بن أبي معيط فضل دايس على رقبته الشريفه وهو ساجد لحد ما (كادت عيناه تبرزان) متخيلين!!! عنيه كانت هتخرج من راسه من كتر الضغط عليه
طغاة قريش كانوا متجمعين ف يوم عند الكعبة وجه النبي يطوف ف كان كل ما يعدي من جمبهم يشتموه ويتوعدوه ويهددوه...يلف ويعدي تاني يعملوا نفس الكلام...وتالت مره نفس الكلام بس المره دي وقفلهم النبي وقالهم "أتسمعون يا معشر قريش، أما والذي نفسي بيده، لقد جئتكم بالذبح" يعني ممكن ادعي عليكم بالهلاك والموت
جم تاني يوم اتجمعوا نفس الشلة دي وراحوا وهجموا عليه عشان يقتلوه وفضل ابو بكر يحوش عنه ويبكي ويقولهم أتقتلون رجلا أن يقول ربي الله!!
في يوم تاني كان بيصلي عليه الصلاة والسلام في الكعبة وجه عقبة بن أبي معيط ولف هدومه حوالين رقبة النبي عشان يخنقه وبرده جه أبو بكر وبعده عنه وقاله عاوزين تقتلوه عشان بيعبد ربنا !!!
محاولات قتل النبي كانت سبب ف إسلام اتنين من اهم الناس اللي اسلمت ومن الناس اللي اتعز بيهم الاسلام والمسلمين والوضع اتغير خالص على ايديهم...مين هما!! حمزه بن عبد المطلب وعمر بن الخطاب رضي الله عنهما
تعالوا الاول نتكلم على حمزه بن عبد المطلب...
حمزه يبقى عم النبي...واخوه في الرضاعة...هو اكبر من النبي بسنتين بس...اولاده يعلى وعامر وعمارة وبنت واحده اسمها أمامه...كانت كنيته (أبو عمارة) ولقب بسيد الشهداء وبأسد الله وأسد رسوله...كان من اشد واشجع رجال قريش...حضر غزوة بدر وغزوة أحد وقتل كفار كتير منهم شيبة بن ربيعة...اتقتل حمزه على ايد وحشي بن حرب الحبشي والمشركين مثلوا بجثته وواحده من المشركات اسمها هند بنت عتبة فتحت بطنه وطلعت كبده وحاولت تاكل فيه بس مقدرتش وبصقته او تفته...النبي قال انه لو كان نزل بطنها مكنتش مستها النار !!!
دي نبذه عنه رضي الله عنه...نرجع لموضوعنا...ازاي أسلم؟!
أبو جهل مره كان معدي عند جبل الصفا فلقى النبي هناك ففضل يشتمه ويسبه ويهدده وبعدين ضربه بحجر ف راسه اتفتحت وفضلت تجيب دم ومشي راح قعد مع كفار قريش عند الكعبة...الكلام دا وصل لحمزة بن عبد المطلب...وكان شديد وشجاع...خد قوسه وراح عند الكعبة لابو جهل ومسك فيه وقاله انت بتشتم وبتضرب ابن اخويا وانا على نفس دينه!!؟؟ وضربه بالقوس فتحله دماغه برده...فالناس هاجت بقى اللي تبعه واللي تبع ابو جهل وكانت هتقوم خناقه...بس ابو جهل قال سيبوه سيبوه انا اللي غلطت وشتمت ابن اخوه
اسلام حمزه بن عبد المطلب كان ف الاول غيره على اهله وعلى ابن اخوه وبعدين ربنا شرح صدره للإسلام وثبته
عمر بن الخطاب
نيته (أبو حفص) ولقبه (الفاروق)
سيدنا عمر اسلم بعد سيدنا حمزه ب 3 ايام...كانوا بالنسبه لقريش المعنى الحرفي لخبطتين ف الراس توجع
النبي عليه الصلاة والسلام دعا وقال "اللهم أعز الإسلام بأحب الرجلين إليك: بعمر بن الخطاب أو بأبي جهل بن هشام"
وكان احبهم لله عمر وفعلا هدى قلبه للإسلام
من كل الروايات نقدر نقول ان الاسلام اتزرع ف قلبه تدريجيا...
عمر كان معروف انه حاد الطباع وقوي الشكيمة وياما عذب المسلمين...بس كان دايما جواه مشاعر عكس بعض...دين اهله وغيرته عليه...والشكوك اللي ف دماغه ناحية الدين دا لما يفكر بعقله ان الاسلام بيدعي فعلا للصح والمنطقي
ف يوم راح عند الكعبة وكان النبي بيصلي وبيقرأ ف سورة الحاقة وعجبه اووي الكلام فقال لنفسه فعلا زي ما قريش قالت دا شاعر ...فقال النبي وهو بيقرأ "إنه لقول رسول كريم، وما هو بقول شاعر قليلا ما تؤمنون" فقال خلاص يبقى فعلا كاهن...فقال سيدنا محمد "ولا بقول كاهن، قليلا ما تذكرون تنزيل من رب العالمين" لأخر السورة
عمر بن الخطاب قال ان دي كانت البداية الحقيقية لدخول الاسلام قلبه...الا ان الكبر والتعصب لدين اهله خلاه يطنش الاحساس دا ويكمل ف عداؤه للإسلام
وف يوم خرج معاه سيفه وقرر يروح يقتل النبي..فقابله واحد ف الطريق قاله رايح فين؟ قاله رايح اقتل محمد...قاله ومش خايف من اهله لو قتلته!؟ رد عمر وقاله انا شايفك تركت دينك انت كمان واسلمت !! فرد الراجل وقاله اقولك عاللي اعجب من كده!! اختك وجوز اختك كمان اسلموا...
اتعصب جدا وراح بسرعه لاخته فاطمة...كان ف بيت اخته وجوزها واحد مسلم اسمه "خباب بن الأرث" كان معاه صحيفه (زي ورقة كده) فيها سورة طه وبيخليهم يقروها...لما سمعوا صوت عمر جاي...استخبي خباب...وخبت فاطمة الصحيفة..بس سيدنا عمر كان سمع صوته وعرف انه جوا...المهم دخل وقالهم ايه الصوت اللي سمعته عندكم ده؟ قالوله عادي بنتكلم..قالهم يعني انتوا مأسلمتوش؟؟ رد جوز اخته وقاله اه أسلمنا...فضربه...جت اخته تحوشه عن جوزها ضربها هي كمان على وشها ضربة خلت وشها كله دم !!
كانت فاطمة اخته غضبانه اوي...وقالت أشهد أن لا إله إلا الله
وأشهد أن محمدا رسول الله
فاق عمر وحس بالذنب لما شاف وش اخته مليان دم...قالهم هاتولي اللي كنتوا بتقروه دا اقراه...اخته قالتله لا يمسه إلا المطهرون...فقام واغتسل...وبدأ يقرأ وعجبه الكلام وقال دلوني على محمد..وقتها خرج خباب اللي كان مستخبي وقاله أبشر يا عمر...الدعوه اللي النبي دعاها بإسلامك استجابت
راح عمر للنبي وخبط عالباب...واحد قام بص وقالهم دا عمر ومعاه سيفه...حمزه بن عبد المطلب قال وماله..لو جاي ف خير هنساعده ولو جاي ف شر هنقتله بسيفه دا...ودخل عمر وخرجله النبي ومسكه من هدومه وقاله انت مش هتفوق يا عمر !!!! مش هتفوق الا لما يحصلك زي ما حصل للوليد بن المغيره !!! وقال اللهم هذا عمر بن الخطاب...اللهم أعز الإسلام بعمر بن الخطاب...فقال عمر أشهد أن لا إله إلا الله وأنك رسول الله
فكبر أهل الدار وكان دا إسلام عمر بن الخطاب رضي الله عنه
❤
❤
بكره بعون الله مكملين
ربنا يحبكم ويختاركم
حب النبي 13
موضوع: الحلقه الـ 13 من سيرة الرسول " صل الله عليه وسلم " 
الثلاثاء أغسطس 23, 2016 12:48 am
