صلوا عليه وسلموا تسليما
نبدأ بسم الله
سيدنا عمر بن الخطاب اسلم 
كانت دي اكبر خبطة حصلت للمشركين ف حياتهم...سيدنا عمر زاد المسلمين عزة وقوة وشرف وسبب للكفار مهانه وذل وخوف واحباط
اول ما اسلم قال لنفسه هو مين اكتر واحد بيكره النبي؟ ابو جهل...طااايب...وقام رايحله وخبط عليه...ابو جهل قاله نعم يا عمر؟ قاله انا جيت اقولك اني امنت بربنا وبمحمد...من الاخر جاي يقوله وريني تقدر تعمل ايه...ابو جهل قفل الباب ف وشه ودخل وهو بيقول قبحك الله وقبح ما جئت به...يعني مقدرش يعمل حاجه
سيدنا عمر كان فخور بإسلامه جدااا...راح برده لخاله (العاصي بن هاشم) وقاله انا أسلمت...برده قفل الباب ف وشه ودخل
المشركين قرروا يقتلوه...كان سيدنا عمر ف البيت قاعد خايف مستني موته...جاله العاص بن وائل (ابو عمرو بن العاص) وكان من حلفاء المسلمين مش عدو ليهم زي ابو طالب كده يعني...المهم سيدنا عمر قاله هيقتلوني عشان اسلمت...قاله لا محدش هيقدر يقرب منك....واتطمن سيدنا عمر...وفعلا طلع العاص لقى المشركين متجمعين قدام البيت بيقولوله جايين نقتل عمر...قالهم عمر ف حمايتي...محدش منهم نطق ومشيوا
هو ليه اتسمى الفاروق؟؟
حكالنا سيدنا عمر وقال ان سيدنا حمزه اسلم قبله ب 3 ايام...ولما انا اسلمت سألت النبي وقلتله هو مش احنا على حق سواء عايشين او حتى لو متنا برده هنبقى ميتين على حق؟؟ النبي قاله اه طبعا...قاله امال احنا مستخبيين ليه !! احنا لازم نخرج...وخرجنا فعلا في صفين انا ف واحد وحمزه ف واحد ورحنا المسجد وبصينا للكفار ف عنيهم من غير خوف وظهر على وشهم كآبه واحباط عمرنا ما شفنا زيهم
ويومها النبي سماني الفاروق لان الله فرق بيه بين الحق والباطل
روايات كتير عن العزه اللي حصلت للإسلام والمسلمين بعد إسلام سيدنا عمر
*ابن مسعود قال عمرنا ما كنا نقدر نصلي عند الكعبة لحد ما أسلم عمر
*صهيب بن سنان الرومي قال لما أسلم عمر الإسلام ظهر ودعينا ليه في العلن وقعدنا عند الكعبة وطفنا وعملنا كل اللي نفسنا فيه وكمان خدنا حقنا من اللي ظلمونا
*عبدالله بن مسعود قال مازلنا أعزة منذ أسلم عمر
زي ما قلنا إسلام سيدنا حمزة بن عبد المطلب وسيدنا عمر بن الخطاب كانوا ضربة كبيرة اوي للمشركين وحاولوا لاخر مرة يوصلوا لحل وكان حلهم التفاوض مع سيدنا محمد نفسه
ف يوم عتبة بن ربيعة (واحد كافر بس عقله رزين وذو مكانة وكنيته أبا الوليد) قال للمشركين محمد قاعد في المسجد لوحده...ايه رأيكم اروح اكلمه واتفاوض معاه....قالوله روح يا أبا الوليد وحاول...وراح فعلا للنبي وقعد جمبه وقاله يا محمد انت مننا ومن دمنا ونسبنا واهلنا بس قلت كلام غريب وغلطت ف الالهه بتاعتنا وضيعت كرامتنا وعملت وسويت...فاسمع مني كام عرض هعرضهم عليك يمكن نوصل لحل يرضينا كلنا...النبي عليه الصلاة والسلام مع انه كان عارف انه مستحيل يوافق بأي عرض الا انه احترمه وقعد وسمعله وقاله اتفضل يا أبا الوليد اتكلم...قاله يا محمد لو انت غرضك من كل اللي بتعمله دا الفلوس قولنا واحنا نجمعلك فلوس لحد ما تبقى اغنى واحد فينا كلنا...ولو غرضك شرف هنخليك سيدنا ومنعملش حاجه الا لما نرجعلك...ولو غرضك ملك هنخليك ملك علينا...ولو اللي بيجيلك دا حالة مرضية هنسعالك انك تتعالج ونصرف عليك كل فلوسنا لحد ما الرؤى اللي بتجيلك دي تبطل تيجي
النبي قاله خلصت؟ قاله اه...قاله طب اسمع انت مني بقى...قاله ماشي اسمع
النبي سمى وقال"حم، تنزيل من الرحمن الرحيم، كتاب فصلت آياته قرآنا عربيا لقوم يعلمون، بشيرا ونذيرا، فأعرض أكثرهم فهم لا يسمعون، وقالوا قلوبنا في أكنة مما تدعونا إليه" وفضل النبي يقرأ وعتبة سند ايده ورا ضهره وريح كده وقعد يسمع...لحد ما وصل النبي للسجدة وسجد...وقاله سمعت يا أبا الوليد؟؟ قاله سمعت...ومشي رجع للمشركين...قالوا بينهم وبين بعضهم ان الوش اللي راح بيه عتبة غير اللي رجع بيه خالص
(فيه روايات بتقول ان عتبة فضل يسمع لحد ما النبي قال "فإن أعرضوا فقل: أنذرتكم صاعقة مثل صاعقة عاد وثمود" وانه اترعب اول ما سمع الآيه دي لدرجة انه قام حط ايده على فم النبي عشان ميكملش واللي أنذرهم بيه يحصل)
الأحوال ااه اتحسنت شوية للمسلمين بس أبو طالب فضل خايف وقلقان على النبي وقاعد يفكر ف التهديد اللي اتهدد بيه هو والنبي وفي محاولات قتله اللي اتكلمنا عليها الحلقة اللي فاتت واتاكد من جواه ان المشركين ناويين فعلا على قتل سيدنا محمد واه إسلام حمزه وعمر عز المسلمين انما هينفعوا بإيه لو حد هجم عالنبي فجأة وقتله!؟؟!
كمان نزل قول ربنا "أم أبرموا أمرا فإنا مبرمون" وفيه إشارة واضحة للتحضير لقتل النبي
قال لا مش هسكت وجمع قومه من بني هاشم وبني المطلب وطلب منهم هما كمان يحموا ابن اخوه وميسيبوش حد يأذيه (لان زي ما اتكلمنا قبل كده ان بالرغم من كفرهم الا ان قريش كانت بتحترم جدااا ان حد ياخد حد ف حماه دي يعني فعلا مينفعش يمسوه وعشان كده صبروا كتير اوي عالنبي لانهم مضطرين لانه في حماية عمه اب طالب) ف ابو طالب بقى قال يزود الحمايه بما انهم بدأوا يقلبوا عليه ويهددوه وفعلاااااا كل اللي كانوا حاضرين من بنو هاشم وبنو المطلب سواء مسلمين او كافرين وافقوا على حماية النبي الا ابو لهب اللي ساب القعده ومشي
خلصنا النهارده وبكره بإذن الله هنتكلم عالمقاطعة العامة
صلوا عليه
حب النبي 14
موضوع: الحلقه الـ 14 من سيرة الرسول " صل الله عليه وسلم " 
الثلاثاء أغسطس 23, 2016 12:51 am
