صلوا عليه وسلموا تسليما
امبارح قلنا كتير من المحاولات اللي قريش حاولت تصد بيها الدعوه وان من المحاولات دي اللي وصل لمحاولة قتله صلى الله عليه وسلم
وقلنا برده إن اسلام سيدنا حمزه وسيدنا عمر أعز الإسلام والمسلمين جدا...وان لما الكفار استباحوا جوار ابو طالب لمحمد يعني محترموش حمايته ليه...ابو طالب دعا بني هاشم وبني المطلب كلهم المسلمين والكافرين ووصاهم بجواره يعني بحمايته برده
طبعا اتقفلت كده في وش قريش من كل الاتجاهات وعرفوا ان قتل محمد بقى مستحيل وهييجي على دماغهم هما وممكن تقوم حرب فلجأوا لأقسى ما يمكن ان إنسان يلجأله لتعذيب شخص
القتل البطيء او زي ما اتسمت "المقاطعة العامة"
ايه هي المقاطعة العامة؟؟
اتفق المشركين على بني هاشم وبني المطلب...اتفقوا لا يقعدوا معاهم ولا يكلموهم ولا يشتروا منهم ولا يبيعوا ليهم ولا يتجوزوا منهم ولا يدخلوا بيوتهم الا لما يسلموا سيدنا محمد ليهم عشان يقتلوه...وكتبوا صحيفة فيها الكلام دا وعلقوها في الكعبة من جوا....وفعلا كل بنو هاشم وبنو المطلب سواء مسلمين أو كفار اتجمعوا واتحبسوا عند بيت ابو طالب كده بين الشعب الا طبعا أبو لهب كان مع المشركين
قعدوا في الحصار دا 3 سنين...متخيلين!!
3 سنين متحاصرين ومقطوع عنهم المايه والأكل...لان لو اي طعام جه مكه كان المشركين بيشتروه كله حتى لو مش محتاجينه عشان هما ميلاقوش حاجه يشتروها...وصل بيهم الجوع انهم كانوا بياكلوا ورق الشجر
وكانت اصوات بكاء الاطفال من الجوع بتسمع لحد كل بيت في مكة....كان احيانا بيوصلهم اكل في السر...زي "حكيم بن حزام" اللي كان بينقل قمح لعمته خديجة...وكانوا لو خرجوا يشتروا من السلع اللي بتيجي من برا مكة (دا لو لقوها) كانوا بيغلوها جدااا عليهم عشان ميعرفوش يشترواكان وقت النوم ابو طالب يخلي سيدنا محمد ينام قدامهم فى فرشة معينه...وبعد ما كله ينام يقوم مبدل ومقومه ومنيم حد من ولاده مكانه...كل دا حرص منه عليه عشان لو حد حاول يقتله
فضلوا 3 سنين على كده ومات منهم ناس من الجوع والمرض وغيره لحد ما حصل نقض للميثاق بتاع المقاطعة
ازاي؟!
اصلا قريش مكنتش كلها موافقه عالمقاطعه دي...فمجرد ما بدأت شراره لنقض الميثاق ناس كتير استجابت
5 رجالة اللي كانوا سبب في نقض الميثاق
اولهم كان "هشام بن عمرو" ودا كان من الناس اللي بيوصلهم اكل في السر...ف يوم راح للراجل التاني اللي هو "زهير بن أبي أمية المخزومي" ودا مامته "عاتكة بنت عبد المطلب" تبقى عمة النبي وكانت دايما تقوله يا زهير ازاي قادر تاكل وتشرب وقرايبك محبوسين هيموتوا من الجوع...فيقولها طب اعمل ايه يا امي وانا راجل واحد..رد عليه عمرو بن هشام قاله انا معاك احنا كده 2 مش واحد...فقاله زهير طيب تعالى ندور على تالت
وفعلا راحوا لواحد اسمه "المطعم بن عدي" وقالوله كذا كذا كذا قالهم طب اعمل ايه لوحدي قالوله احنا معاك احنا 3 قالهم طيب تعالوا ندور على رابع
راحوا ل "أبي البختري بن هشام" وقالوله نفس الكلام قالهم ومين هيساعدني قالوله احنا قالهم طيب ندور على خامس
راحوا الخمسه ل "زمعة بن الأسود " قالوله نفس الكلام برده وقالوله احنا الخمسه سوا واتفقوا فعلا على نقض الصحيفه وزهير قال انا اولكم انا اول واحد هيتكلم
وفعلااا...
راحوا عند الكعبة ولم زهير الناس وقالهم يا أهل مكة يعني احنا ناكل ونشرب ونلبس واهل هاشم واهل المطلب بيموتوا من الجوع!! احنا لازم نقطع الصحيفه الظالمه دي
ابو جهل رد وقاله والله ماهي متقطعه...رد زمعة بن الاسود قاله لا هنقطعها احنا عمرنا ما كنا راضيين عنها اصلا ورد ابو البختري اه احنا عمرنا ما كنا راضيين عنها واكد المطعم بن عدي وهشام بن عمرو على نفس الكلام
ابو طالب كان هناك قاعد يسمع اللي بيحصل
ليه؟
لان النبي عرفه ان ربنا بعت الأرضة( نوع من الحشرات) للصحيفه فكلتها كلها الا اسم ربنا ...فوقف ابو طالب وقالهم محمد بيقول كذا كذا...لو كان كداب خليكم مقاطعينا زي مانتم..ولو كان صادق يبقى ترجعوا عن القطيعه والظلم دول...فوافق الناس
وفعلا قام المطعم بن عدي عشان يقطعها لقى الأرضة دي كلتها كلها فعلا إلا "باسمك اللهم"
وبكده تم نقض الصحيفه وخرج النبي واللي معاه من الشعب بعد ما شاف المشركين آيه ودليل على نبوته بس زي ما قال ربنا "وإن يروا آية يعرضوا، ويقولوا سحر مستمر"
خلصنا النهارده...صلوا عليه كمان مره
حب النبي 15 ~ .
.